فسحة عائلية ...مع اول يوم محاضرات

Posted on الثلاثاء، أكتوبر 13، 2009 by ريم وجيه


يوم 10-10
طبعا اى حد طبيعى هيقول صحيت من النوم ...بس بما انى مانمتش اساسا ...يبقى نطنش النقطة دى !!
قمت جهزت لبسى ونزلت عشان اروح الكلية ...اول يوم احضر محاضرات ..وعندى من الساعة 12 لحد الساعة 6 متواصل !!!
رحت متأخرة طبعا - عادتى ولا هاشتريها - بس الحمد لله لحقت مكان اقف جوه القاعة ...بغض النظر عن الزحمة وكتمة النفس ..والكحة والعطس الشغالين ...وان الدكتورة بتشرح من غير ميكروفون - عشان عطلان- وانى ماسمعتش غير جزئية من الكلام ...ومن الوارد جدا انها ماترتبطش بالجزئية اللى بعدها اصلا!!
خلصت المحاضرة بسرعة الحمد لله ...وناس كتييييير مشيت الحمد لله ...وقدرت اتحرك من مكانى ...والاقى كرسى كمان - عصر المعجزات لسه ماخلصش يا رجالة-
هى قالت لنا استنوا الدكتور اللى بعدى داخل على طوووووووووول ...ماحدش يمشى ، وطبعا الدكتور جه بعد حوالى ساعة الا ربع ...وماسك فى ايده المايك - لوولولولولولى - ....بس ماعرفناش نشغله -هع هع هع- ..راح مشى وقال انا راجع لما المايك يتصلح ...طبعا كل الناس ماصدقت ومشيت ...جه واحد يادوب ضغط على زرار فى جهاز تبع المايك ..المايك اشتغل على طول - كان على وشه حتة تعبير ...فاتكم بجد- وللأسف الدكتور رجع تانى ..وقعد يتكلم وبتاع ...وخلصنا على الساعة 2 وربع ...والمحاضرة اللى بعدها تبتدى الساعة من 4 لحد 6!!!
اتصلت بنوجا ..وسألتها على لقاء المدونين السكندرى ...الشبكة كانت زى الفل ...تلات اربع كلامها ماسمعتهوش ...بس الاجمالى ان احمد ما اتصلش ..وبالتالى معندهاش فكرة عن اللقاء ...بس اول ماتعرف هتتصل بيا وتقولى ايه النظام !!
طبعا قعدت محتارة ..اروح ولا استنى ..فى الاخر قررت استنى...رحت جبت سندويتشات واتغديت ...واخدت الدوا ...وعلى الساعة 3 ونص رحت للمدرج ..واستقريت هناك ....واكتشفت ان مصر جابت جوووووووووووووووووووووووووون .

4 الا ربع انجى اتصلت ...والسماعات اصلا كانت فى ودن سمر ساعتها وقالت لى احمد اتصل ..وهما هناك فى عزة ..هتروحى يا ريم؟!

لو انتى رايحة انا رايحة ....ها هتروحى ؟ ....واتفقنا نتقابل عند عزة على البحر ... وكانت اول مرة اروح لعند عزة لوحدى من غير نوجا ...وبالتالى اتوترت جدا ...بس ربنا ستر وواحدة صاحبتى من تربية طلعت قاعدة جنبى -للاسف مش فاكرة اسمها ...على الرغم من اننا فضلنا زمايل فى تربية سنتين تقريبا ...بس ده بيوضح حالة الذاكرة عندى عاملة ازاى- ..وقعدنا نرغى لحد ماهديت شوية ..ونزلتنى عند عزة ...اتصلت بانجى ...وقالت لى انها فى السكة .... شوية ووصلت وعدينا السكة وسلمت على احمد وعرفتنى عليه - ريم صاحبتى الانتيخ - وانا طبعا فى حالة رهبة وكسوف - اول مرة احضر لقاء من النوع ده ...ده غير انه ماحدش عارفنى اصلا - واتعرفنا على عادل وبدراوى وحنان وهبة _ كلهم مدونين - واتعرفنا كمان على فاتيما - فاطمة والدة يوسف - وكمان صاحبة مدونة حروف - للاسف مش فاكرة اسمها ..سامحينى معلش ..بس زى ماشفتى فوق ..ذاكرتى فيها ثقب اوسع من ثقب الاوزون- وفى كمان مدون افتكرنا - نوجا وانا - اخوات - فرحت اوى اوى اوى ساعتها - ...وناس كتير تانية ..بس للاسف انا كنت مرتبكة بقه وبالتالى كل ده ضاع ...معلش بقه !!
المهم بعدها مشينا ..ومشينا ....ثم مشينا ...وفضلنا مش عارفين رايحين فين ..لحد ماوصلنا الشيخ وفيق فى رأس التين - اول زيارة ليا للمنطقة دى فى اسكندرية على فكرة - ...وانجى يا عينى طلعت كانت واخدة نفس المشوار مشى عشان توصل لعزة ..قعدت تصوت ...انا لسه واخدة نفس المشوار مشى ....- واحتمال تكون بتدعى عليا فى سرها ساعتها-
المهم ...قعدنا شوية فى الشيخ وفيق ...وتقريبا الجرسون كان قريب عزة اللى كنا بنشتم فيها ...لأنه كان فاضله تلات دقايق ويولع فينا ...وشوية وقمنا - انجى وحنان وعادل وانا معاهم طبعا - وطلعنا نقعد على شاطىء راس التين ...اول ما دخلنا اكتشفنا ان فى 4 كلاب ..مسكت دراع انجى ...ياللا بينا نروح يا أمى ...بس بعدوا بقه ..وكان فى ولد صغير بيضرب كلب فيهم - المنظر ده ضايقنى بغباء- ووقفنا قرب المية اوى ...حنان وانجى لعبوا طيارة مرتين ...- مش باعرف العب انا اساسا- وفرحوا بيها اوى اوى الحمد لله ...بعد كده رحنا بلينا رجلينا كلنا ...والجيبات طبعا ..يعنى احنا نتبل والجيبات لا!!
بعدها بشوية احمد جه ...وبعده كلهم خلصوا وجم ....وقعدنا نتكلم ونهزر ...وانا استغلبت الفرصة ...وقعدت اتمشيت على الرمل المبلول بالمية ...وكل مرة الموج ييجى ....وانا ابعد ...ابتدى ادوخ - باخاف من البحر جدا ساعات - احترم نفسى وامشى - الادب فضلوه عن العلم برده -
الدنيا بدأت تضلم بقه ...وقلنا نروح ....ومشينا من على الشط على انغام اغنية ذهب الليل وطلع الفجر
فضلنا واقفين بره شوية على الشارع ...وسلمنا كلنا على بعض ...ولقينا مشروع الحمد لله واحمد ركبنا ودفعلنا ...
بس بعد شوية نزلنا عشان ناكل وكده ....وبعدها روحنا بقه ....وانجى كانت نيماااااااانة جدااااااااااااااااااااااااااااااااا وزورها كان واجعها اوى يا عينى
وبكده اليوم انتهى ...خلاويص
شوية كلام على جنب
نوجا : احلى احتفال ممكن يتعمل بمناسبة نجاة براثن الاكتئاب من شخصى المتواضع .... والسر الخطير بقه ...اغنية ذهب الليل وطلع الفجر كانت جاية كمفاجأة - اول ما سمعتها ضحكت ضحك - مفاجأة زى العسل بجد ....ويوم جميل ..واحلى احتفال بالعودة للحياة الطبيعية- ولو انى كنت مرعوبة ليغمى عليكى من قلة النوم وعدم الاكل ...بس ربنا ستر الحمد لله .
حنان : عسولة جدا ...وبعد شوية حسيت كاننا اصحاب من فترة وعارفين بعض من زمان ...واتفقنا اننا هنتقابل تانى باذن الله بعيدا عن لقاءات المدونين - جيران بقه ...حد عنده اعتراض ؟؟-
هبة : عسولة جدا ...اول ماشافتنى قعدت تتعرف عليا واخدتنى من ايدى عشان تعرفنى على الناس تقريبا ..وحاولت تخرجنى من حالة الذهول اللى انا فيها ....وبرده قالت لى لنا لقاء كسكندريين تانى ...انت بس حدد الميعاد والمكان يا جميل وهتلاقينى موجودة باذن الله - ونوجا معايا طبعا ...اتوه لو جيت لوحدى ..وماينفعش حد يمشى من غير انتيخته برده
أحمد : اخيرا انجى شافتك!! ...كل مرة تيجى سيرتك واحنا قاعدين ..تكلمنى على لقاء المدونين ..وتقولى تخيلى يا ريم ..جارى وماشفتهوش قبل كده خالص!! ......... احمد فكرنى جدا بواحد قريبى على فكرة...له نفس اسلوبه ...والشكل العام كمان ..اتشرفت بيك بجد يا احمد .
عادل : شخصية مرحة جدا ...كان معانا على طول ....واخد انطباع انى مصدومة او مزبهلة على طول الحمد لله - اعمل ايه انا طيب ..وشى تعبيراته قوية شويتين!!!- برده فكرنى بواحد قريبى - واحد تانى غير اللى فوق- باسلوبه والشكل العام برده ....اتشرفت بيك فعلا يا عادل .
ماما قاتيما : سلمت عليها مرة اول مارحت ..و وانا ماشية ...وقالت لى واحنا ماشيين اننا هنقعد مع بعض المرة الجاية اكتر باذن الله ...مستنية اليوم ده بفارغ الصبر .....ماما فاتيما من الناس اللى لما تقف معاهم بس ...تحس انك فى واحة ..تحس انها أم فعلا ..جو من الحنان والرقة بيميزها ...فرحت بجد انى شوفتك
بقية الناس اللى لسه ماعرفتش اساميهم ...سعيدة بيكم بجد ...ويارب اشوفكم تانى واكون تجاوزت حالة الارتباك الاولى ..واتعرف بيكم كلكم من تانى
بالنسبة لى ...انا حسيت انها زى حفلة عائلية ...واننا كلنا اخوات وسط بعض ...خارجين نتفسح ....فرحت اوى اوى باليوم ...واتمنى يارب انه يتكرر تانى كتيييييييييييييييييير
كان معكم من بيتنا
ريم وجيه

** الصورة اللى فوق دى من تصويرى - فرحانة بقه بالموبايل الجديد- من على شط راس التين ...فى صور تانية للشط احتمال اضيفها فى بوست تانى لوحده ...ياللا سلام

8 Responses to "فسحة عائلية ...مع اول يوم محاضرات":

فاتيما says:

انا كمان فرحانة زيك يا ريم ياليوم الجميل دا
و فرحانة بشوفانك مع إننا ملحقناش
و نفسى يتكرر عن قريب إن شاء الله
و هنعقد كتييييير ويا بعض
و نحكى
و نرغى
و ننم
ميزة هذه الأيام
إنها بتعرفك على ناس حلوة
و تقربكوا من بعض
و على اللقاء الجاى هنكون وزرنا بعض زيارات كتييييير
و ساعتها لما نتقابل
هيكون فيه كلام قد كداااااااا
هينقال
و هنقعد على البحر من اول اليوم إن شاء الله
بس تبقى ساعتك نايمة كويسة و مصحصحلنا
و بلاها كلية و محاضرات
خدنا ايه من العلام انا مش فاهمة ؟ّ!!!
(وش بيغمز و مش بيتكلم جد)
انطباعاتك عن الناس تقريبا كلها فى محلها بالمللى ..الواد عادل ابنى بالتدون زى ماقوس قزح وش الخير داليا بتقول ...تقدرى تقولى عليه ابن قلبى
و البكرى قبل يوسف و أطيب قلب صادفته عشان كدا بفرح لما بيقولى يا ماما و طالعة حلوة منك إنتى كمان
تحفة الصورة على فكرة ..
رجعتنى للحظة السحرية دى
وحشنى البحر يا عيااااااال
و وحشتونى معاه
بوسة و حضونة على رأى يوسف ابنى

reem says:

وانا اقول المدونة منورة اوى كده ليه!!!
يااااه ..ياريت بجد يتكرر كتييير ...لانى فعلا نفسك اشوفك اوى واقعد معاكى كتير خالص جدا
وعشان خاطرك هنام كويس خالص جدا ...ومن عينيا ..ده تطنيش المحاضرات ده واخدة فيه دكتوراه مع مرتبة الشرف ..لا مرتبة مين ...دى مراتب ومخدات !!!
عادل دمه خفيف اوى ...ولو انه كان قرب ينسينى اسم المدونة واسمى ..او على ابسط تقدير ...اغيرهم الاتنين !!! يرضيكى يا ماما فاتيما ساعة الا ربع عمالة اقوله فى الاسم ومش واصله ...وكل ده وهو على الكرسى اللى فى وشى!!! ...بس بجد فعلا حسيت كأننا كلنا عيلة بتتفسح ..مش ناس اول مرة تشوف بعضها !!
ربنا يخليكى يارب ..هو طلع حلو عشان ليكى بس ...وهو طلع منى كده بصراحة ...حاسة الاسم مش جاى غير كده معايا
الصور بقه ...تقريبا ليكى عندى صورتين او تلاتة ..وللبحر حوالى 4 صور ..طبعا صوركم اكيد مش هتتنشر ..هى صحيح ليكم بضهركم وانتوا فى المية ...بس مش هانشرها..لو عايزانى ابعتها ..تحت امرك طبعا
وبوس كتييييييييير وحضونات كتيييير خالص لحد ما اشوفك قريب باذن الله

فاتيما says:

متحرمشى منك يا حبيبتى
معلش أعذرى عادل اصله هوه و سوووو اتشحورو فى المواصلات و هما جايين
و الواد يا كبدى مكنش مركز قوى
إنتى كمان كسوفة قوى
و صوتك واطى قوى
و لا دى كانت من اثار قلة النوم ؟؟
طبعا يسعدنى اخد الصور عشان احتفظ بيها لذكرى اليوم الجميل دا
إيميلى اهو يا ميمو و ابقى شاكرة ليكى جدا
modynoty@gmail.com
و ميرسى على البوسات و الحضونات الحلوة
زيك

reem says:

الله يخليكى يارب ومايحرمنيش منك
لا والله عادى ...بتحصل معايا كتير ساعات ...
ومن عينيا حاضر ...باذن الله النهاردة تلاقى الصور على الميل
واشوفك قريب باذن الله يا ماما فاتيما
بوسة وحضونة

adel says:

يا اهلا :):)
بجد انا انبسط قوي باللقاء و بيكي و بانجي (صديقي اللدود)
وانا كنت بهزر (واخر بوست برضه كتابته كلمة هزار اوعي تزعلي )
هههههههههههههههه

--------
انا لسه قاري كلام ماما و كلامك :$:$:$
ربنا يخليكوا يارب
شكرا قوي علي الكلام ده
بس وربنا انا مش حلو قوي كده :):):)
انا فيا العبر
بس انتي عارفة الام بقي :):)

وبعدين انا عاوز الصور :(
وربنا اعيط

----------
علي فكرة كنت عاوز اكمل كلام بس مش عارف ...الكلام مثبتني :$
شوية و هارجع

reem says:

اهلا يا عادل
ازيك؟
لا ماتقلقش ..انا عارفة انه هزار ومازعلتش خالص والله
...........
الله يخليك يارب (:
احم
بالنسبة للصور ..انا بعتها خلاص لماما فاتيما !!
واللى هاقدر ابعتهولك هو صور البحر ...لانى ما اعرفش من اللى فى الصور غير انجى وماما فاتيما ...ومش هاعرف استئذن الباقى وكده!!
...........
منتظراك تكمل كلام فى الوقت اللى تحبه

همس الاحباب says:

ههههههههههه
هو انتى اللى كنت شبه انجى
بجد فعلا افتكرت انكم اخوات
اليوم كان جميل
بس مع الايف انتى جيتى متاخر كنا خلاصنا فصلنا مياه ونور
ان شاء الله تتكرر فى المرات القادمة
تحياتى

reem says:

همس الاحباب
هههه
ايون ..هذا انا!!!
وانا فرحت اوى اوى لما حضرتك افتكرت كده ...اصل كلام فى سرك ...انا باعزها اوى اوى ..وقريبة من قلبى اوى اوى !!
معلش هو ظروفنا يومها ماجتش غير كده
بس ان شاء الله متعوضة فى مرة تانية ناخد اليوم من اوله
ونورتونا بجد