بوست ع الفاضى

Posted on الاثنين، نوفمبر 16، 2009 by ريم وجيه


 نفسى اكتب بوست جديد بقالى فترة ...بس مش عارفة اكتب ايه وازاى وليه!!

اكتب عن ايه ولا ايه ولا ايه!!

اكتب بقية المقال بتاع المتحرشين ...ولا اكتب عن الكتابة ...ولا اكتب خاطرة جديدة ...ولا اهلوس عليكوا من جديد!!

انكد عليكم ....ولا اشارككم ذكرياتى الحلوة!!

طيب واكتب ليه!! وايه لازمة كتابتى !!

وجع دماغ ع الفاضى ...ولا عشان اطلع شوية من اللى جوايا!!

وياترى كتابتى لها تاثير على اى حد ؟؟ ولا تاثيرها فى سلامتى النفسية فقط!!

دماغى زحمة اوىىىىىىىىى ...ومحتاجة حد ينظم المرور فيها اوى اوىىىىىىىىى

9 Responses to "بوست ع الفاضى":

adel says:

ياستي اكتبي اي شئ و احنا هنقرا اي حاجة

احنا ورانا ايه يعني

ههههههههه

adel says:

واول تحليق

فووووووووووووووووووووو

فاتيما says:

الواد عادولة ابنى سبقنى
و دايما محلق يا بابا ..أيوه كدا
بصى يا ست ريم
زى ما عادل قالك تمام
اكتبى انتى و ملكيش دعوة
هنقرى و نعلق
متشغليش بالك قوى بالتصنيفات
و تأثير الكلام على من يقرأ
و ايوه دى حقيقة
الكتابة بتساعد على تحسين نفسية الإنسان و مزاجه
و التدوين دا أنا بشبه بدفتر اليوميات أو المذكرات الشخصية
بتاعة البنى آدم و اللى زمان كان يكتبها لنفسه و يرجع يقراها
او يقريها لحد عزيز عليه
دلوقتى دفتر مذكراتنا منشور برغبتنا
و حريتنا و بيقراه عشرات و يمكن مئات الاحباب و من فى حكمهم يعنى ....
اكتبى و ميهمش ما بعد الكتابة
فى إنتظار ما بين ضفتى عقلك
وجديدك يا حبيبتى
بوسة و حضونة يا حبيبتى

reem says:

عادل
منور المدونة يا ابيه اولا
ويارب تكون خفيت خالص جدا
خلاص ماشى ...بس اى طماطم تتحدف ...هاقولهم ان انت اللى قلت على فكرة
عيش ندل تموت مستور :P:P

reem says:

ماما فاتيما
ربنا يخليكى يارب ...ما اتحرمش منك ابدا
هى بس دماغى حاساها زحمة اوى يا ماما فاتيما ...حاسة انى عايزة اكتب فى مليوووووووون موضوع ...وفى نفس الوقت حاسة انى مهما كتبت ...عادى يعنى...مش هتفرق كتير!
ربنا يخليكى بجد يا ماما فاتيما ...احساس ان حد مهتم او منتظر اللى انت عايز تقوله بيفرق كتييييير اوى
بوسة وحضونة قد كده

عاشقه الرومانسيه says:

اكتبى اى شئ جواكى مهما كان
قبل ما اعرف يعنى ايه تدوين
كنت باطلع ورقه وقلم واكتب اى عك فى اى خزعبلات وبعدها بحس براحه
دى فعلا من الصحه النفسيه
اكتبى واحنا هنقرى لان فعلا يهمنا صحتك النفسيه
(:

reem says:

دودو
ازيك يا قمر؟
ربنا يخليكى يارب يا قمر
ومايحرمنيش منك ابدا
- ماكنتش اعرف انى مهم كده عندكوا!!
بحد متشكرة ليكى اوى يا دودو
ماتعرفيش كلامكم واهتمامكم ده فرق معايا قد ايه

shicooo says:

كلنا هذا الرجل

.......

بس السؤال لو بطلتى كتابة .... هتعملى ايه؟


امضاء ....
واحد كان معدى من هنا

reem says:

شيكو
اهلا بيك
ههههههههههههه ...هذا الرجل!!!
بما انى مش رجل ...ف فى مليون حاجة تتعمل ...ممكن انشغل بشغل البيت ..اتعلم مهارات جديدة ...ادور على شغل ...ان شاء الله حتى اصبغ شعرى ...الفكرة هنا الشعور بالانجاز والتعبير عن الذات ...ان فى حاجة حصلت ..خطوة تمت ...مهارة اكتسبت او اتطورت!!
بس حاليا استقريت انى باكتب من اجل سلامتى النفسية ..وبالتالى ...باعك براحتى بقه فى المدونة ..وهتلاقى فى هبل بكتير !!
نورت المدونة يا شريف ...وانت صاحب مكان طبعا ..مش بس واحد معدى!!