وداعا ..خاطرة

Posted on الأحد، مايو 23، 2010 by ريم وجيه


بقالى فترة طويلة ماكتبتش ..لا بوست جديد ..ولا اى عمل جديد فعليا وعايزة انزل عمل جديد فى نفس الوقت ...لانى زهقت من البوستات الشخصية ...وخاصة ان الحياة ما بتتغيرش ماعدا ان الناموسة اللى كانت مقيمة عندى من السنة اللى فاتت طفشت هى وعيلتها الحمد لله ...بس كانت ناموسة صاحبة مبدأ بصراحة ...مارضتش تطفش غير لما زهقت من كتر الضرب وسبتها فى حالها تعيش حياتها ...او يمكن مالقتش دم تانى تقريبا ..الله اعلم !
بداية ..الخاطرة من 2007 .. واسيبكم مؤقتا مع كلماتها
************

حبيبى ...إنما هى رسالة وداع ، لن تصل يوما ليد صاحبها

حبيبى ..إننى راحلة بعيدا ، حيث يمكننى أن أصرخ حبيبى ولا تسمعنى.

راحلة إلى مملكة وحدة ، حيث لا أكون عبئا إلا على نفسى ، ولست بعائق لحبك لها!

حيث لا يمسح دمعى إلا يدى ،

ولا يحمينى من قسوة الحياة إلا قوة تحملى ،

حيث أدرك أنك لم تعد لى ،

لم تعد كلمة حبيبى من حقى !

حيث أدرك أنها هى من ستحميها من ضربات الزمن

أنها هى من ستحنو عليها ،

تمسح دموعها ،

تضمها مواسيا مهدهدا

وليست أنا !

سأبتعد إلى حيث لا أراك هامسا إليها بكلمات عشقك ، وآيات جمالها

حيث لا أراك تضم يديها لتدفئهما من برودة الشتاء ،

ولا أراك معها راقصا على أنغام الزفاف.

سأرحل إلى حيث لا ترانى خائفة مكسورة

حيث لا تلمح دموعى مشفقا او متعجبا

سأرحل حيث ربما أستطيع مواجهة واقعى

أو وأد حلم حبى

سأرحل إلى حيث لا تستطيع أن تعلم كم أحبك

إلى حيث لا تستطيع أن تأتى وتعطينى مالاحق لى فيه ..من حب ورعاية!

سأرحل وربما أحمل معى ذكريات حبى لك ؛

لتحمل لى بعض السعادة ، وكثير من الشقاء الذى قدر لى

سأرحل إلى حيث أكون عروس أحلامك ،حبيبتك

وطفلتك وزوجتك وأمك وصديقتك

كل ما يمكن ان تحب واكون

سأرحل حيث قلبى لك دائما

وقلبك لغيرى دائما

حيث أتخيلك سعيد وإن كان مع غيرى

حيث أكون وحيدة لأننى لا أستطيع أن أكون لغيرك

حيث لا أكون حبيبتك وتكون حبيبى

حيث لا تستطيع أن تعلم ضعفى وانكسارى

حيث لا تستطيع أن ترانى جثة قتلتها الظروف

حبيبى وداعا

تمت بحمد الله 2007

*************

نهاية ...عايز اراؤكم اوى خالص جدا

وبس خلاص

8 Responses to "وداعا ..خاطرة":

غير معرف says:

انا اول حد يقري البوست رغم انه العمل قديم
وعاجبني جدا ولو انها مش طالبه عياط بس نجحتي انك تخلي عيني تغرغر بالدموع

ربنا يوفقك ياريمي

adel says:

ممممممم
ياخواطرك

اجمل شئ انه الكلام بيفضل كلام
مابيتنفذش :)

كان غيرك اشطر

حبيت الكلام انا .... بس الفعل اهم

هوبتي says:

اولا انا بعيش في فتره من الحزن الشديدة من ساعت وفاة امي وكملت بانفصالي عن الشاب الي كنت بحبه الي اكتشفت مع الوقت انه كان بيكلمني بس كده لله والوطن وشفقه وبس

وبحاول ابعد عن اي مود حزين لان انا عايشه في حزن رهيب بقالي 5 شهور دلوقتي
بس ما عالينا يعين كلامك عجبني جدا ودا اكتر جزء لمسني

سأرحل حيث ربما أستطيع مواجهة واقعى

أو وأد حلم حبى

سأرحل إلى حيث لا تستطيع أن تعلم كم أحبك

إلى حيث لا تستطيع أن تأتى وتعطينى مالاحق لى فيه ..من حب ورعاية!

سأرحل وربما أحمل معى ذكريات حبى لك ؛

لتحمل لى بعض السعادة ، وكثير من الشقاء الذى قدر لى

غير معرف says:

شهادتي فيكي ياريم مجروحه

كلمات بجد روووووووووووووووووووووووووووووووووووووووووعه


ربنا يحميكي ويحفظك يارب


اختك ^_^ wild ant

Reem Wageeh says:

رودى
احم ...ساعات كتير بييجلى احساس بالذنب لما باخلى حد يعيط على فكرة!
ميرسيه بجد يا رودى لوجودك ولتشجيعك يا قمرى
ويارب يوفقك ويوفقنا جميعا

Reem Wageeh says:

عادل
اولا حمد لله على السلامة
منور المدونة بوجودك بجد
بالنسبة لكونه كلام مش بيتنفذ ..الخاطرة عبارة عن مشاعر صرفة ..وماحدش بيمشى بمشاعره لوحدها من غير اى حاجة تانية...والا راح فى ستين داهية قبل ما يكمل خمس سنين !
لكن لو جينا للواقع عشان يبقى فى فعل ...الانسان بيبقى مش تحت رحمة مشاعره بس!
بيبقى فى عادات وتقاليد ومجتمع وناس واهل واسرة ..وحاجات محسوبة ع الواحد وحاجات ماينفعش تتحسب عليه!!
ويفضل الكلام ..كلام ..صعب اوى انه يبقى فعل

Reem Wageeh says:

هويتى
اهلا بيكى يا قمر فى اول زيارة ليكى للمدونة
وربنا يعينك ويخفف عنك يارب حزنك
والبقاء لله فى والدتك ربنا يرحمها برحمته الواسعة يارب ويصبرك
وبالنسبة لقصة الحب ..فمش عارفة اقولك ايه بصراحة!!
ربنا يعينك وتمر الازمة وتنكسر حدة الحزن :)
وبحد انا اسفة اذا كنت قلبت عليكى المواجع بكلامى
ومتشكرة جدا تعليقك ورأيك فى العمل
واتمنى اشوفك كتير ع المدونة يا قمر

Reem Wageeh says:

دولىىىىىىىىىىىىى
ازيك يا حبى؟
الله يخليكى يا قمراية يارب
ويارب يحفظك انتى ويحميكى من كل شر
انتى وكل اللى بنحبهم يارب
بوسة كبيرة