كشّر ...كده كده الصورة هتطلع حلوة

Posted on الأحد، ديسمبر 01، 2013 by ريم وجيه


اللى يعرفنى من زمان يعرف انا قد إيه بأكره إنى اتصور ...وده بيرجع غالباً لإعتقادى إنى صورى دايماً بتطلع وحشة جدا ...اوحش منى فى الواقع ...واللى هو انا اصلا مش نيكول كيدمان فى الواقع يعنى!
واللى يعرفنى دلوقتى هيلاقينى باتصور فى اغلب خروجاتى...واوقات باتصور من غير خروجات ومن غير اى حاجة خالص.  ...رغم إن فى اوقات بابقى كارهة اتصور جدا..بس باتصور .

عندى على اللاب مايقرب من 10 آلاف صورة تقريبا..أكيد مش كلهم تصوير طبعا وكتير منهم متاخدين من الانترنت ...بس اعتقد ما لايقل عن ألف صورة متصورين موجودين .
وطبعا فى محاولة إنى ألاقى صورتى بالبلوفر البمبى اللى رباب عاملهولى وسط الصور عشان اوريه لطنط إيمان ..كانت محاولة فاشلة تنين..ودخلنا فى البومات وذكريات كتيييييييييير جدا ولقيت طنط إيمان بتقولى " إنتى عايشة حياتك " ..ورحنا قفلنا الصور يائسين على وعد داخلى منى لنفسى إنى هأصور لها البلوفر صورة لوحده

صور مع أصحابى فى فطار رمضان..صور مع صاحباتى فى الترام ..صور مع رشا فى البيت..مع أول هدية جاتلى من شلة أصحابى "الإخوة الأعداء" فى حياتى..وأول حفلة مفاجأة..-والأخيرة فى الواقع-

صور حفلة عيد ميلادى اللى رشا عملتهولى..والبالونات الحلوة قوى قوى ..صور صاحباتى سوا وانا حتى ماكنتش معاهم اصلا .

صورى مع هيام لما كانت فى إسكندرية والفيديو اللى بتفرج عليه كل فترة ..وصورنا فى القاهرة

صور كتييييييييييييير قوى قوى قوى ..كمية ذكريات مهولة وغير طبيعية ومتسجلة بالألوان الطبيعية  ^_^

صور لناس علاقتى بيها اتقطعت مع الزمن...بس الصورة سايبة علامة حلوة معاهم

صورة ليا غيرت مسار ملامحى فى مرحلة صعبة ..وصورت غيرت مسار حياتى نفسها

صورى فى التدريبات والمؤتمرات .

فى فرح منى صاحبتى  من كام شهر ..انا كنت حاسة نفسى بشعة جدا ..لدرجة إنى مكنتش حابة اتصور معاها عشان ما احسش انى بوظت جمال لحظتها ب إحساسى المريع ده ...ده غير طبعا إنى أساساً بخاف من الأفراح والمناسبات الاجتماعية العائلية بشكل بشع..ومش بحضرها إلا فى أندر الحالات ..ولولا غلاوة منى ماكنتش حضرت .

فى فرح رشا أختى..جالى نفس الهاجس بالظبط ...وكنت هاهرب من الكاميرا فى أول لحظة حسيتها بتيجى عليا زى عادتى ..بس افتكرت عشق رشا للصور – بتصور بمعدل صورة كل 3 ثوانى -_-
و افتكرت إنها لو مالقتش صور ليا فى الفرح غالبا هتسلخنى حية وبعدين تمثل بجثتى بعد ماتقتلنى !
فى فرح رشا اتصورت كمية صور مهولة ...ومع كل الناس تقريبا ..رغم إنى معرفش شكلى عامل إزاى أصلا ومابصتش فى مراية من ساعة ماسبنا الكوافير وطول الفرح وانا ماقعدتش تقريبا..وبالتالى أكيد فى حاجات كتير ضربت فى شكلى
والأغرب إنى نزلت الصور كلها...اللى شايفة ان شكلى حلو فيها واللى لأ

فى لحظة معينة اتكسر هاجس الشكل الوحش جوايا ..وبقا مش فارق عندى ....هوس الكمال راح..وبقا فى عشق للحظة الحلوة .

من كام سنة فى فورمات عقيم مات الهارد اللى عليه آخر صور لأمى الله يرحمها ..ساعتها كرد فعل عكسى ضحكت كتير قوى..ضحك بحسرة ..وقلت إذا كانت هى راحت..جت ع الصور يعنى!
بس دلوقتى..اوقات كتير قوى قوى..بيبقى نفسى اتصور معاها...وكل ما اتخنق او اتضايق..افتح صورنا وابتسم..حتى لو ابتسامة مليان دموع الاغتراب ...بس على الأقل أقول كنا هنا سوا..واحتفلنا فى اللحظة دى سوا..او عيطنا فى اللحظة دى سوا .

الموضوع ببساطة إنى اكتشفت إنى مش محتاجة أكون حلوة أو سوبر ستار أو فوتوجينيك زى سعاد حسنى ..عشان أتصور وأسجل اللحظات الحلوة – أو حتى الصعبة – فى حياتى .
اكتشفت إنى محتاجة احتفظ باللحظات دى من حياتى ..عشان أحس قد إيه انا عشت حياتى .

وفى يوم من الأيام..هاطبع من الصور دى اللى اعلقه على لوح خشب على الحيطة قدامى ..واحاوطه بالالوان والبهجة والدلع..واللى هاحتفظ بيه فى "سكراب بوك " من تصميمى ..واللى هاطبعه واحطه فى ألبوم ...واللى هالغيه .

ماتيجوا نتصور سوا بقا ^_^ 




10 Responses to "كشّر ...كده كده الصورة هتطلع حلوة ":

سميحة ميحة says:

عارفه انا كان عندى نفس الهاجس بتاع انى مش حلوه بالصور و فجاه و بدون مبرر بقيت اعمل كده زيك بردو و فجاه تانى بقيت اقيم اللحظات المتشابه منها و اللى لا بالسابق و بقيت مش عايزه اراقب ملامحى و هى بتكبر والهم بيتزحزح و يلاقى مكان على كتافى مع كونى بكبر بس لاااااااا زلت بحب اتصور مع صحباتى واهلى و جيرانى و احب اخدهم باحضانى و بحبك اوى !
اوى فوق ما الكلمه بمياصتها البناتى تساع ,انتى كلمه ربنا على الارض و حضن دافى من على بعد ,انتى من ايات ربنا ليا انه بيحبنى فخلاكى بحياتى اصلا و بحياه اللى حواليكى و غصب عن اللى جبهوم لازم يحبوكى والا يبقواحمير و يكتشفوا ان ودنهم بتكبر من لوحدها :)
ربنا يحلى ايامك :*

مونتي بوكيه ورد says:

احيييي ع الفولة من كلامك اللحظة الحلوة روحك حلوة و كان نفسي اكتب كتير عن الاحساس ده .. انت ممكن تكوني مش مرتاحة في شكلك في لقطات كتير م الصور بس بجد اللحظة الحلوة بتثبتلك اد ايه بتخليكي جميله .. صورتك مع البلالين و اديكي ممدوده بتسلمي ع طفل صغنن في الفرح و بتبوسيه ..و الكادر لما بيجمعكم مع اغلي الناس في ضحكة حلوة و لحظة حلوة .. الله ع الصورة اما تجمعنا و بلاش ابدا لان كل لحظة حلوة بتبتدي بضحكة😃

مونتي بوكيه ورد says:

الله يرحم والدتك و يتغمدها بالف مليون رحمة ونور يارب
ساعات بنحس اننا ممكن في اي لحظة نفارق حد بنحبه بنجري ونتصور معاه ممكن هو يفتكرنا بيها او احنا نقعد بالساعات نكلم صورته و نحكيلها ونشكيلها و نبكي قدامها بحرية مش اي حد بنرتاح لما بنفضفضله .. ساعات الصورة بتريحنا

غير معرف says:

انتى حلوة أوى يا ريم، وكان عندى نفس الفكره من التصوير زمان بردو :) لدرجه انى مكنتش بنزل من البيت من غير ماحط مكياج انشالله حاجه واحده!!

الحته بتاعه مامتك أثرت فيا أوى، وعنيا دمعت .. الله يرحمها ويحسن إليها، مامتك من أعظم الستات اللى عرفتهم على فكره :) مع انى مشوفتهاش ولا مره

وأخيرًا وليس بآخر .. بحبك جدًا فعلا

أنا إسراء بالمناسبه

мαησηα says:

عارفة انا كمان مكنتش بحب الصور لاني بشوف نفسي مش حلوة

بس ف وقت اشتغلت وتخلصت من شوية حاجات كانت مشايقاني بعدها بقيت نفسي بتصور والصور بتطلع حلوة اووووووووووووووووووي

بس علشان وثقت ف نفسي واتصالحت معاها

تعالي نتصور الصورة اكيد هتطلع حلوة علشان القلوب صافية وحلوة ♥ :* :*

ربنا يرحم ماما ويغفرلها ويجمعكم ف جنته بعد عمر طويل ليكي يا قلبي

Reem Wageeh says:

سميحة حلوة الحلوات
تعرفى ان كلامك بيحلى أيامى فعلا ..ربنا يفرحك ويحبك ويخليكى ليا :* <3 <3

Reem Wageeh says:

مونتى
آمين يارب يسمع منك ويرحمنا جميعا
والصور بتريح فعلا ساعات ..بتنعش القلب ..و مبسوطة ان الفولة عجبتك ^_^

Reem Wageeh says:

مونتى
آمين يارب يسمع منك ويرحمنا جميعا
والصور بتريح فعلا ساعات ..بتنعش القلب ..و مبسوطة ان الفولة عجبتك ^_^

Reem Wageeh says:

إسراء ..انتى اللى حلوة قوى ياجميل
وانا بحبك جدا فعلا برده
وآمين يارب..وماما كمان اعتقد انها مبسوطة بيا نوعا دلوقتى :)
وبالتالى اعتقد هتبقى مبسوطة بيكى برده ^_^
تسلمى لى

Reem Wageeh says:

منمونتى...وانا بحاول اتصالح مع نفسى دلوقتى ..بس المشكلة انها عنيدة زيادة شوية ومغلباانى..بس هصالحها..ولازم نتصور سوا


ربنا يسمع منك يارب ويخليكى ليا